Google+ Followers

الثلاثاء، 21 يناير، 2014

إهداء إلى مصر (شعر غنائي)

مصر






عودتينا ع البساطة
مع إن عزك مالى البيوت

يا جميلة ونشتاقلك أجمل
والحب ماهوش شيئ يتأجل
والحلم اللى احنا حلمنا به

اننا هانعيش ليكى ونموت



يا عروسة النيل ياحضارة ومجد
يامزيج فتان بين لعب وجد
انتى الجنة اللى انا باسكنها
وبزرع فيها وباحصد ورد
انتى الارض اللى ماتبخلش

ولا بتصدى إن قصدك حد




نشوفك....
 فى لمعة عين الطفل
مرسومة...بدون ألوان
نشوف السمرة فى ترابك
نشوف الخضرة على نيلك
نشوف البسمة فى شفايف
وعين حاسة برضا وامان
ولو نطق الرضيع هايقول

أنا مصرى...أنا إنسان





بحبك أكتر من امبارح
بحبك وانا واعى..
بحبك وانا سارح..
بحبك وانا بزرع..
بحبك وانا طارح



 يا منة ربنا الغالية
ونعمة تستحق الشكر
يا بسمة عمرنا كله
وفرحة تعمنا بالبِشر
ياحضن بطيبته وحنانه

بينزع من قلوبنا الشر





يا أرض الخير..ومهد الطير
وحلم الغير يعيش فيكى
حياتى تهون واكون ممنون
ما دُمت بعمرى هافديكى



*****************
خالد أبو العيمة....مدونة سور الأزبكية
http://khaled-ibrahim.blogspot.com

ليست هناك تعليقات: